Қазақстан, Қытай, Қырғызстан, Үндістан, Пәкістан, Ресей, Тәжікстан, Өзбекстан сыртқы істер министрлері Бейжіңдегі осы отырыстың барысында ШЫҰ-ның саяси, экономикалық және гуманитарлық салалардағы алдағы міндеттерді талқылады, сондай-ақ Циндао декларациясының жобасын және ұйымның қызметіне қатысты басқа да шешімдерді қарастырды. Халықаралық және өңірлік күн тәртібінің өзекті мәселелері бойынша байыпты пікір алмасылды. 2017 жылы маусымда Астанада өткен ШЫҰ-ның саммиті барысында қол жеткізілген уағдаластықтардың іске асыру барысы қарастырылды.
Қазақстан Сыртқы істер министрі Қайрат Әбдірахманов өз сөзінде азық-түлік қауіпсіздігін қамтамасыз ету, ШЫҰ-ға мүше мемлекеттердің көліктік бағдарларының жан-жаққа тармақталған жүйесін ескере отырып, автокөлік және темір жолдарды дамыту мәселесінің өзектілігін атап өтті. Сонымен қатар Қазақстанның ШЫҰ-ның Іскерлік кеңесі мен ШЫҰ-ның Банкаралық бірлестігінің министрлік мәжілістері мен жұмыс топтарының тетіктері қамтылған неғұрлым ауқымды ынтымақтастыққа жан-жақты қосылуын қолдайтынын атап, сауда-экономикалық салада қабылданған құжаттарды түгендеуді және олардың іске асырылуын қамтамасыз етуді ұсынды.
Отырыс қарсаңында делегация басшылары Қытай Халық Республикасының Төрағасы Си Цзиньпинмен кездесті. Ол Қытай тарапы ШЫҰ-ның дамуына жәрдем етуді елдің сыртқы саяси басымдықтарының бірі ретінде қарастыратынын және ұйымға басқа мүше мемлекеттермен бірлесе саяси салада өзара қолдау көрсетуге, өңірде қауіпсіздік пен тұрақтылықты қамтамасыз етуге, «Бір белдеу – бір жол» бағдарламасы аясында ынтымақтастықты нығайтуға, гуманитарлық алмасуларды кеңейтуге дайын екенін білдірді.
Жалпы, сыртқы саясат ведомстволарының басшылары ШЫҰ өзара сенімділікке, өзара тиімділікке, теңдікке, өзара консультацияларға, мәдениеттің алуан түрлілігін құрметтеуге және бірлесіп даму ұмтылысына сүйене отырып, өзін беделді халықаралық ұйымның жаңа түрі және халықаралық қатынастар жүйесінің маңызды қатысушысы ретінде бекіткенін айтты.
